ەكسپو-2017 كورمە كەشەنىن كورۋگە كەلدى
ەنەرگيامەن جابدىقتاۋ, ورتالىقتان جىلىتۋ جانە تەلەكوممۋنيكاتسيالار سالاسىنداعى «جاسىل» تەحنولوگيالارمەن اينالىساتىن RTS نەمىس كومپانياسىنىڭ قىزمەتكەرى فولكەر شتيۋۆە ەكسپو-2017 قۇرىلىس الاڭىنا ارنايى ساپارمەن كەلدى. شىلدەنىڭ باسىندا ول تۋعان قالاسى بيلەفەلدتەن (گەرمانيا) شىعىپ, استاناعا دەيىنگى 5 200 شاقىرىمدىق جولدى جارىس ۆەلوسيپەدىمەن ءجۇرىپ ءوتتى.
شتيۋۆەنىڭ وسىنداي ساياحاتقا شىعۋىنىڭ باستى ماقساتى – استانادا وتەتىن حالىقارالىق كورمەنىڭ سالىنىپ جاتقان نىساندارىمەن تانىسىپ, نەگىزگى تاقىرىپ «بولاشاقتىڭ ەنەرگياسى» تۋرالى كوپ ماعلۇماتتار الۋ.
ۆەلوسيپەدشى 40 كۇنگە سوزىلعان ساياحاتىن 4 شىلدە كۇنى RTS كومپانياسىنىڭ بيلەفەلدتەگى شتاب-پاتەرىنەن باستادى. بالتىق ەلدەرى مەن رەسەي اۋماعىن باسىپ وتكەن ول 8 تامىزدا استاناعا جەتتى. ونى «ەكاتەرينبۋرگ-استانا» تاسجولىندا ءبىر توپ جەرگىلىكتى ۆەلوسيپەدشى قارسى الىپ, ەلوردانىڭ ورتالىق كوشەلەرىمەن ءجۇرىپ ءوتتى. ساياحاتىن كورمەنىڭ قۇرىلىس الاڭىندا اياقتاعان شتيۋۆەنى ول جەردە «استانا ەكسپو-2017» ۇلتتىق كومپانياسىنىڭ وكىلدەرى كۇتىپ تۇردى.
«ءبىز سىزبەن ەكسپو-2017 اۋماعىندا قاۋىشقانىمىزعا قۋانىشتىمىز. ءسىز ەكولوگيالىق تازا كولىك جانە جاسىل تەحنولوگيالار ءداۋىرى باستالعانىنىڭ جارقىن ۇلگىسىن كورسەتىپ وتىرسىز. استانادا وتكىزىلەتىن كورمە تاجىريبە الماسۋ مەن يننوۆاتسيالىق جەتىستىكتەردى كورسەتۋگە ارنالعان جاھاندىق الاڭعا اينالاتىن بولادى», – دەپ اتاپ ءوتتى «استانا ەكسپو-2017» ۇلتتىق كومپانياسىنىڭ وكىلى ساۋلە بولەباەۆا.
سونداي-اق, قۇرىلىستىڭ قارقىنى تۋرالى اڭگىمەلەگەن ول قوناققا ارنايى ەستەلىك سىيلىقتار تابىس ەتتى. بۇدان بولەك, نەمىس ۆەلوسيپەدشىسى سالىنىپ جاتقان نىساندارمەن تانىسىپ, كەشەندى ارالاپ كوردى.
ۆەلوجورىقتىڭ سوڭعى 100 شاقىرىمىندا شتيۋۆەگە ونىڭ ارىپتەسى, RTS كومپانياسىنىڭ باسشىسى ديرك شاۋمبۋرگ قوسىلدى. كومپانيانىڭ گەوتەرمالدى جىلۋ-
مەن قامتاماسىز ەتەتىن ءونىمى ەكسپو-2017 نىساندار قۇرىلىسىندا پايدالانىلادى دەپ جوسپارلانعان. بۇل تەحنولوگيا سالىنىپ جاتقان عيماراتتاردا قولايلى اۋا ورتاسىن قالىپتا ۇستاۋ ءۇشىن تەرەڭدىگى 120-130 مەترلىك 85 ۇڭعىمانى بۇرعىلاۋ كەزىندە قولدانىلاتىن بولادى. كورمە كەشەنىنىڭ نىساندارى ىشىندە ءبىرىنشى بولىپ اياقتالۋى ءتيىس «كورمەنى ۇيىمداستىرۋ كەڭسەسىنىڭ» قۇرىلىسى بىتكەننەن كەيىن اتالعان تەحنولوگيانىڭ ارتىقشىلىقتارىن تولىق باعالاۋعا مۇمكىندىك تۋادى.
«قۇشاق جايا قارسى الىپ, ەكسكۋرسيا ۇيىمداستىرعاندارىڭىز ءۇشىن العىس بىلدىرەمىن. قازىردىڭ وزىندە ەكسپو-2017 جوباسى ءوزىنىڭ اۋقىمىمەن, ماقساتى بيىك جوسپارلارىمەن تاڭعالدىرۋدا. ماعان نىسانداردى 2017 جىلى سالىنىپ بىتكەن كۇيدە كورۋ اسا قىزىقتى بولىپ تۇر. سوندىقتان ەكى جىلدان كەيىن وتباسىممەن استاناعا مىندەتتى تۇردە كەلەمىن. قالاعا كىرگەن بويدا قولعا الىنعان باستامالاردىڭ اۋقىمدى ەكەنىن بايقادىم. دەگەنمەن, سىزدەردى الدا ءالى تالاي جۇمىستار كۇتىپ تۇرعانى بەلگىلى. كەلەشەكتەگى يگى ىستەرىڭىزدىڭ ناتيجەسى كۇتكەندەگىدەن اسىپ تۇسەتىنىنە سەنىمدىمىن. كەشەنمەن تانىسقاننان كەيىن قازاقستاننىڭ قۇرىلىس بارىسىندا قۋات كوزىنىڭ تيىمدىلىگىنە جانە ەكولوگيالىق تازا ءونىم مەن تەحنولوگيالاردى قولدانۋعا ايرىقشا ءمان بەرىپ وتىرعانىنا كوز جەتكىزدىم», – دەيدى فولكەر شتيۋۆە.
ەكسپو-2017 كورمەسىنىڭ تاقىرىبى «بولاشاقتىڭ ەنەرگياسى» ەكەندىگىن نازارعا العان نەمىس ساياحاتشىسى ءوزىنىڭ ۆەلوجورىعىن ەكولوگيالىق تازا تەحنولوگيالاردى قولدانۋعا قوسقان ۇلەسى دەپ ەسەپتەيدى.
ەلامان قوڭىر,
«ەگەمەن قازاقستان».